Tariflərin artırılmasından sonra İrəvanda ictimai nəqliyyat Cənubi Qafqaz regionunda ən bahalı nəqliyyata çevriləcək.

Kainat.tv xəbər verir ki, bunu “Sputnik Ermənistan”a açıqlamasında İrəvan meriyasının nəqliyyat departamentinin keçmiş rəhbəri Edqar Qalstyan deyib.

Eyni zamanda o vurğulayıb ki, şəhər rəhbərliyinin təşəbbüsü ilə qiymət artımı heç bir halda əsaslandırılmır.

Xəbər verildiyi kimi, 2025-ci il yanvarın 1-dən Yerevanda ictimai nəqliyyatda sərnişindaşıma üçün yeni tariflər tətbiq ediləcək. Müvafiq olaraq, tək biletin qiyməti 300 dram (təxminən 1,3 manat), 30 günlük bilet paketinin qiyməti 8800 dram, 90 günlük biletin qiyməti 23600 dram, illik bilet paketinin qiyməti 88 min dram olacaq. Eyni zamanda, paketlər qeyri-məhdud sayda səfərləri təmin edir.

"Tarifin artırılması üçün orijinal peşəkar hesablamaları nə qədər tapmağa çalışsam da, tapa bilmədim", - Qalstyan qeyd edib.

O əlavə edib ki, rəhbərlik etdiyi illərdə apardığı hesablamalara görə, İrəvanda nəqliyyat tarifi hər səfər üçün 150 dramdan (65 qəpik) çox ola bilməz.

"300 dramlıq tarif məntiqsizdir və rasional hesablamalara sığmır. Eyni zamanda, yaranmış sosial xarakterli problemlər heç bir şəkildə həll olunmur. Əhalinin ən yoxsul təbəqəsi nəqliyyatdan istifadə edir, ona görə də subsidiyalara ehtiyac var, nəqliyyatın saxlanması xərclərini kompensasiya etmək üçün 150 dram tarifi ilə, subsidiya ilə hər şey öz yerinə düşəcək”, - Qalstyan qeyd edib və dünyanın heç bir ölkəsində ictimai nəqliyyatın gəlir mənbəyi hesab edilmədiyini vurğulayıb. //Publika.az