Bu il Naxçıvanda 2 tona yaxın yaş barama istehsal edilib ki, bu da Zərdab rayonundan sonra Azərbaycanda ikinci yüksək nəticədir. Bu haqda yerli Kənd Təsərrüfatı Nazirliyi məlumat yayıb. İstehsal olunan baramanın 630 kilosu Babək rayonunun payına düşür.
Nazirlikdən verilən məlumata görə, dövlət dəstəyi hesabına baramaları yerli kümçülər yetişdirib və onlara subsidiyalar verilib.
Kainat.tv yazır ki, bu günlərdə “Gündəlik Naxçıvan”a şikayət edən yerli icra nümayəndələri isə, bu məlumatın əksini iddia edirdilər. Nümayəndələr bildirirdilər ki, icra hakimiyyətləri onları baramaları öz vəsaitləri hesabına yetişdirməyə məcbur edirlər.
Ayrılan subsidiya isə, nazirliklə icra hakimiyyətləri arasında bölüşdürülür. Onların digər iddiasına görə, Naxçıvanda barama biznesinə yerli kənd təsərrüfatı nazirinin müavini Xəyalə Dadaşova nəzarət edir.