Elm və təhsil naziri Emin Əmrullayev növbəti dəfə sosial şəbəkələrdə qınaq obyektinə çevrilib. Belə ki, nazirin Bakı İdman Sarayında keçirilən Qazaxıstan universitetlərinin təhsil sərgisi zamanı qazaxıstanlı uşaqla görüntüləri “səmimi video” başlığı ilə paylaşılsa da, uşağın nazirlə ünsiyyət qurmaq istəməməsi birmənalı qarşılanmayıb. Videoya yazılan şərhlər arasında təhsil üzrə eksperti Elşən Qafarovun fikirləri diqqət çəkib. Ekspert bildirib: ““Uşaqlar həssas olur” deyirlər. Qazaxıstanlı körpə də başa düşür ki, onun Azərbaycandakı yaşıdlarının gələcək həyatını biznesinə, mənasız təlimlərə və layihələrə xərcləyən biri ilə üzləşib...”
 
E.Qafarov Pravda.az-a açıqlamasında nazir Emin Əmrullayevin ünvanına yazdığı fikirləri belə əsaslandırıb.
 
“Məsələ insanın səmimiyyətində deyil, idarəçi, təhsil sisteminin başında dayanan şəxs olaraq nə qədər səriştəli və bacarıqlı olmaqdadır. Bu gün təhsil ölkə əhalisinin böyük bir hissəsini əhatə edir. Ən azı hər iki nəfərdən biri ümumtəhsillə bağlıdır. Amma bu gün təhsilin bütün pillələrində - məktəbəqədər, ümumtəhsil, peşə, orta, ali təhsildə baş verənlər, xaos, tənəzzül bütün vətəndaşlar kimi məni də çox təəssüfləndirir. Səmimi, yaxşı insan olmaq tamamilə başqa anlayışdır. Emin Əmrullayevin şəxsiyyəti ilə işimiz yoxdur. Təhsildə verilən səriştəsiz qərarlar, anlaşılmaz, izahı olmayan təyinatlar, qeyri-mücərrəd addımlar, təbii ki, insanı düşünməyə, danışmağa vadar edir. Emin Əmrullayev hər bir azərbaycanlı kimi səmimi, çox yaxşı insan ola bilər, amma o, bu gün təhsil sisteminin başında dayanır. Təhsildə atdığı addımlar qəbuledilməzdir. Şəkər zavodunun, çay fabrikinin əməkdaşlarını irəli çəkməklə dayanmır, Təhsil Texnologiyaları Mərkəzinə müavin təyin edir... Bu, bütün təhsil proqramlarını, kurikulumları işləyən bir şöbədir, təhsil sisteminin özəyidir. SOCAR-da təlimçi işləmiş birini bu şöbəyə təyin etmək nə deməkdir? Emin Əmrullayev izahı olmayan təyinatlarına davam edir. Sanki bilərəkdən Azərbaycan təhsilində uyğun olmayan kadrları yerləşdirir. Onun təyinatlarının heç birində funksional vəzifələrdə təhsil adamları yoxdur. Təsəvvür edirsiniz? Çıxıb cəmiyyətdə səmimi olsun, burda nə var ki? Bu, ayrı şeydir, elm və təhsil naziri kimi ölkənin gələcək taleyini zərbə altına qoyan addımlar atmaq tamamilə başqa şeydir. Xalqa yaxın olmaq üçün xalqa xidmət etmək, cənab Prezident İlham Əliyev göstərişlərini yerinə yetirmək lazımdır. Emin Əmrullayev vəzifəsinin öhdəsindən gəlməlidir, amma onun atdığı addımlardan görünür ki, nə Prezidentin təhsil sahəsində verdiyi tapşırıqları yerinə yetirilir, nə də xalqa xidmət olunur. Əksinə, hazırda təhsil insanlarında bu qədər narazılıq və sosial gərginlik Emin Əmrullayevin xidmətlərinin nəticəsidir. Ya bilə-bilə, ya da bilməyə-bilməyə... Real budur ki, bu insan təhsil sistemini idarə edə bilmir, verdiyi qərarlar təhsil sisteminin daha da məhv olmasına gətirib çıxarır. Nəzarət sistemi, idarəetmə sistemi yoxdur. Hansı arqumentlərlə bu təyinatları verir? Emin Əmrullayevin özünün xəbəri varmı, ölkə məktəblərində nələr baş verir? Sabah cənab Prezident onu işdən azad etdikdən sonra siravi bir vətəndaş olanda nə qədər səmimi olmaq istəyirsə, nə qədər xalqa yaxın olmaq istəyirsə, olsun. Onsuz da, üstündə Azərbaycan Respublikasının vətəndaşlığı var. Amma düşünmürəm ki, nazir kimi səmimidir, xalqa xidmət edir. Xalqa xidməti işinin nəticəsindən görünür”, - E.Qafarov qeyd edib.