Bir neçə gün əvvəl Azərbaycan Karate Federasiyasının vitse-prezidenti Rafael Ağayev vəzifəsindən istefa verib. 6 dəfə dünya çempionu olan karateçi qurumun fəaliyyətsizliyi ilə bağlı mediaya açıqlamalar verib.

Dünya çempionu olan məşhur kareteçimiz niyə ölkəsinin idman camesindən narazıdır?
Onu ölkəsini tərk etməyə məcbur edən hansı səbəblər var? Peşəkar idmançının istefası Azərbaycan Karate Federasiyasının Prezidenti Ülvi Quliyevi, Gənclər və İdman naziri Fərid Qayıbovu narahat edirmi?

Kainat.tv xəbər verir ki, “Yeni Gundem”in məlumatına görə, digər məqam ondan ibarətdir ki, Azərbaycan Karate Federasiyası Gənclər və İdman Nazirliyinin keçirdiyi ilin idman yekunları ilə bağlı tədbirlərə qatılmamasıdır.

Nazirlik hansı səbəbdən dəvət etməyib və yaxud federasiya niyə iştirak etməyib? Bu kimi suallarda ictimaiyyət üçün qaranlıq qalmaqda davam edir.

Diqqətçəkən nüanslardan biri də odur ki, bu xəbərin məhz Azərbaycanın idman rəhbərliyi ilə bağlı yayılan informasiyalarla eyni ərəfədə yayılmasıdır.

2021-ci ildən Gənclər və idman nazirinin müavini vəzifəsində çalışan Mariana Vasilevanın tutduğu vəzifədən kənarlaşdırılması, Milli Məclisin gənclər və idman komitəsinin üzvi Ülvi Quliyevlə nazir Fərid Qayıbov arasında münasibətlərdə müəyyən ziddiyyətlərin yaranması ilə bağlı yayılan informasiyalar vəziyyətin ürəkaçan olmadığını deməyə əsas verir.

Qalib ölkəmizdə idmanın sağlam təbliğ və inkişafına böyük önəm verən cənab Prezident İlham Əliyev və birinci xanım Mehriban Əliyeva hər zaman idmanda nizam- intizamın ön sırada dayandığını dəfələrlə vurğulayıblar. Cənab Prezidentin 22 illik ölkəmizə uğurlu rəhbərliyi dövründə də idmanımızın inkişafı, idmançılarımızın beynəlxalq arenada uğurla təmsil olunmasına şəraitin yaradılması istiqamətində işlərin görülməsi bunun bariz göstəricisidir.

Ancaq son olaylar idman ictimaiyyətini də təssüfləndirməyə bilməz.

Mariana Vasilevanın vəzifədən azad olunduğu axşam nazir Fərid Qayıbovun onunla bağlı xatirə paylaşımı etməsi də o qədər də başa düşülən deyil.
3 ildən çoxdur nazir postunu tutan Qayıbovun fəaliyyətində də əfsuslar olsun ki, hər hansı yeniliklər baş verməyib. Təkcə milli futbolumuzun nəticələrini nəzərdən keçirtsək hər şey daha aydın olacaq.

2005-ci ildən Milli Məclisin deputatı olan, hal hazırda da parlamentin Gənclər və İdman komitəsinin üzvi Ülvi Quliyevin də idmanımızın problemləri ilə bağlı hər hansı fikir və təkliflərinə rast gəlməmişik. 20 ildir deputat olan komitə üzvinin bu qədər sakit qalması da məlum deyil. Necə də olsa, Milli Məclisin iclasında ən azı ağsaqqal deputat kimi öz tövsiyyələrini çatdıra bilər.

Son zamanlar Azərbaycan Karate Federasiyasının Prezidenti, deputat Ülvi Quliyevlə nazir Fərid Qayıbov arasında münasibətlərdə mənfilik yaşanıldığı da yayılan informasiyalar sırasındadır. Azərbaycan idmanın iki yüksəksəviyyəli şəxsləri arasında bu cür soyuqluluğun səbəbi nədir?

Fərid Qayıbov Ülvi Quliyevlə hansı məsələdə razılaşmır və yaxud hansı proseslər baş verir? Bu sualların cavabları da həmçinin qapalı qalır.

Qarşı tərəfin mövqeyini dərc etməyə hazırıq.