Kainat.tv xəbər verir ki, Türkiyənin ilk orta mənzilli ballistik raketi olması gözlənilən “Cenk” layihəsi son dərəcə məxfilik şəraitində həyata keçirilir.
Bu raket inventarlaşdırıldığı zaman Türkiyəni bu sahədə növbəti mərhələyə daşıyacaq. “Roketsan” tərəfindən hazırlanan bu raket Türkiyənin ilk orta mənzilli ballistik raketi (MRBM) olacaq.
Mühərrik və yanacaq kimi kritik alt sistemləri olan “Cenk” ballistik raketinin ilk sınaq atışının qısa müddətdə reallaşması gözlənilir. “Cenk”in ehtiva etdiyi texnologiyalarla dünyanın ən qabaqcıl orta mənzilli ballistik raketlərindən biri olacağı gözlənilir.
“Türkiyə” qəzetində yer alan xəbərə görə, Türkiyənin Müdafiə Eksperti Turan Oğuz bu sahədəki işləri və Somalidə qurulacaq bazanın əhəmiyyətini qiymətləndirib.
O, sözügedən raketlərin sınaqdan keçirilməsinin vacibliyinə diqqət çəkib: “550 km-lik raketləri sınaqdan keçirdik, Qara dəniz uyğun idi, amma 1000 kilometri sınaqdan keçirə biləcəyimiz coğrafiyamız yoxdur. Bu testləri keçirmək üçün uzun müddətdir Somali ilə danışıqlar aparırıq. Bu baxımdan Somali dünyanın ən yaxşı üç yerindən biridir. Bu sınaqlar okeanlarda edilə bilər. Türkiyə hazırda 1000-3000 kilometr mənzilli ballistik raketlər hazırlayır”. //Publika.az
