Qlobal müharibə başlasa, bu, Zəngəzurda hərbi gərginliyə səbəb ola bilərmi?
Kainat.tv xəbər verir ki, Globalinfo.az-a danışan politoloq Zeynal Əmrəliyev deyib ki, hazırda müxtəlif dövlətlər arasında gərginlik artmaqdadır:
“Donald Trampın ABŞ-da prezident seçkilərində qalib gəldikdən sonra İrana qarşı sərt xətt tutacağı gözlənilir. İsrail Baş naziri Benyamin Netanyahu da İrana müdaxilənin tərəfdarıdır. Genişmiqyaslı toqquşma baş verərsə, təbii ki, bütün bölgədə qarışıqlıq yaranacaq. Əgər Ermənistan kənar qüvvələrin bölgədə yerləşməsinə yaşıl işıq yandırarsa, gərginlik Zəngəzur ərazisinə keçə bilər”.
Z.Əmrəliyev vurğulayıb ki, digər qaynar nöqtə Gürcüstandandır:
“Qərb uzun müddətdir ki, Ukraynada Rusiyanın mövqelərini parçalamaq üçün Gürcüstanda ikinci cəbhənin açılmasına çalışır. Bu səbəbdən prosesə mane olan Gürcü Arzusu hökumətini devirməyə çalışdılar, ancaq istəklərinə çatmadılar. Gürcü xalqının yenidən mövcud iqtidarı dəstəkləməsi bu planı arxaya atdı. Ancaq müxalifətin aksiyaları davam edir. Gürcüstanda hakimiyyət dəyişikliyi baş versə və Qərb burada ikinci cəbhə açsa, bu bütün Cənubi Qafqaza təsir göstərəcək. Ancaq yenə də əsas məsələ Ermənistanın mövqeyi ilə bağlıdır. İrəvan revanşa cəhd edərsə, Azərbaycan adekvat cavab verməyə məcbur olacaq. Buna görə də Ermənistan rəhbərliyi üzərinə götürdüyü öhdəliklərə riayət etməlidir”.
Zeynal Əmrəliyev
Politoloq qeyd edib ki, ümumilikdə Cənubi Qafqazda yaşanan hansısa gərginlik hər üç dövlətə (Azərbaycan, Gürcüstan, Ermənistan) mənfi təsir göstərəcək:
“Bakı, Tbilisi və İrəvan əməkdaşlığı gücləndirməli, kənar qüvvələrin regiona gəlməsi və buradan başqa məqsədlər üçün istifadə etməsinə mane olmalıdırlar. Ermənistanda oturuşmuş Avropa Birliyinin “müşahidə missiyası” və Fransa kəşfiyyat qrupu hazırda bölgədə sabitliyə ən böyük təhdiddir. Çox təəssüf ki, Paşinyan hökuməti baş verəcək təhlükəni öncədən dəyərləndirə bilmir”.
