ABŞ-də İranla bağlı aparılan siyasətə ictimai dəstək zəifləməyə başlayıb.

Kainat.tv Musavat.com-a istinadən xəbər verir ki, Associated Press (AP) tərəfindən keçirilən son sorğunun nəticələri amerikalıların əhəmiyyətli hissəsinin müharibənin artıq həddini aşdığını düşündüyünü ortaya qoyub.

Araşdırmaya əsasən, respondentlərin 59%-i ABŞ-nin İranla müharibədə “çox uzağa getdiyini” hesab edir. Bu göstərici ölkə daxilində hərbi eskalasiyaya qarşı narahatlığın gücləndiyini nümayiş etdirir.

Sorğu həm də amerikalıların prioritetlərinin daha çox iqtisadi və strateji məsələlərə yönəldiyini göstərir. Belə ki:

67% – neft və qaz qiymətlərinin artmasının qarşısının alınmasını çox vacib sayır
65% – İranın nüvə silahı əldə etməsinin qarşısını almağı əsas hədəf kimi görür
39% – İranın İsrail üçün yaratdığı təhlükənin qarşısının alınmasını çox vacib hesab edir
33% – İran rejiminin devrilməsini dəstəkləyir

Diqqət çəkən məqamlardan biri də İsrailin təhlükəsizliyi məsələsinin amerikalılar üçün əvvəlki dövrlərlə müqayisədə daha aşağı prioritet kimi görünməsidir. Eyni zamanda, rejim dəyişikliyi ideyasına dəstəyin zəif olması Vaşinqtonun mümkün addımları ilə bağlı ictimai konsensusun olmadığını göstərir.