3+3 formatında növbəti görüşlər İrəvan və Bakıda baş tuta bilər.

Kainat.tv Publika.az-a istinadən xəbər verir ki, bunu İrəvanda keçirdiyi mətbuat konfransında Rusiya Xarici İşlər Nazirliyinin rəhbəri Sergey Lavrov deyib.

Rusiyalı nazir razılaşmanın bağlanması, kommunikasiyaların açılması, sərhədin demarkasiyası və delimitasiyası vasitəsilə tam sülhə nail olmaq yolunda Moskvanın İrəvan və Bakıya dəstəyini təsdiqləyib. Onun sözlərinə görə, proseslər 2020-22-ci illərdə ən yüksək səviyyədə üçtərəfli sazişlər toplusuna əsaslanmalıdır.

Lavrov həmçinin bildirib ki, 3+3 formatının inkişafında kifayət qədər potensial görür. Artıq Tehran və İstanbulda iki görüş keçirilib. İlk ikisinin nəticələrinə əsasən regionda sülhün və sabitliyin, iqtisadi və nəqliyyat əlaqələrinin, zəngin mədəni ənənələrin möhkəmləndirilməsi üçün müəyyən nikbinlik var.

Ermənistan və Azərbaycan növbəti görüşlərə ev sahibliyi etmək istəyirlər.

"Onlar öz aralarında razılığa gələ bilərlər. Belə ki, növbəti iki tədbir Ermənistan və Azərbaycanın paytaxtlarında baş tutsun", - Lavrov qeyd edib.