Rusiya ABŞ-a Ukraynanın işğal olunmuş ərazilərindəki qiymətli metallar üzərində hüquq təklif edib – NBC News

Rusiya ABŞ-a Ukraynanın işğal olunmuş Donetsk və Zaporojye bölgələrindəki nadir torpaq elementləri və digər qiymətli metallara sahiblik hüququnun paylaşılması barədə razılaşma təklif edib.

Kainat.tv NBC News-a istinadla xəbər verir ki, Putinin köməkçiləri bu təklifi 18 fevralda Səudiyyə Ərəbistanında keçirilən görüş zamanı ABŞ rəsmilərinə təqdim ediblər.

Xəbərdə bildirilir ki, Rusiya xüsusi olaraq ABŞ rəsmiləri ilə müzakirə üçün hazırladığı ssenarilərdə Tramp administrasiyasına işğal olunmuş ərazilərdəki faydalı qazıntılara çıxış imkanı verməyi nəzərdə tuturdu.

Lakin Tramp administrasiyası hələlik bu razılaşmanı qəbul etməyə dair öhdəlik götürməyib, eyni zamanda tamamilə rədd də etməyib.

Trampın açıqlaması: “Bu, mümkün ola bilər”

ABŞ Prezidenti Donald Tramp bu məsələ ilə bağlı jurnalistlərə açıqlamasında “Rusiya ilə işğal olunmuş Ukrayna ərazilərində faydalı qazıntılarla bağlı razılaşma mümkündür” deyə bildirib.

Bununla belə, o, Putinlə bu barədə danışıqlar aparıb-aparmadığını açıq şəkildə deməyib.

Rusiya və ABŞ arasında yeni iqtisadi əməkdaşlıq?

NBC News-un mənbələri iddia edir ki, Səudiyyə Ərəbistanındakı danışıqlarda Rusiya ABŞ-a işğal olunmuş Ukrayna ərazilərini əhatə edən yeni bir iqtisadi tərəfdaşlıq təklif edib.

Bu təklif Ukraynanın ərazi bütövlüyü və beynəlxalq hüquq baxımından ciddi narahatlıqlar yaradır. ABŞ administrasiyasının bu təklifi qəbul edib-etməyəcəyi hələ dəqiq bilinmir. //Musavat.com