Gürcüstanın Baş naziri İrakli Kobaxidzenin son açıqlaması gündəm olub. Belə ki, o, Bakı-Tbilisi-Bakı sərnişin qatarının fəaliyyətinin bərpası ilə bağlı Azərbaycan Prezidenti İlham Əliyevlə müzakirələr aparıldığını deyib. Onun çıxışı mətbuatda sərhədlərin açılmasının anonsu kimi dəyərləndirilib. Lakin bu barədə hər hansı qərar yoxdur. 

Proses sərhədlərin açılması ilə nəticələnə bilərmi? Bu, tərəflərə nə vəd edir?

Kainat.tv xəbər verir ki, Globalinfo.az-a danışan Əmək və Əhalinin Sosial Müdafiəsi Nazirliyi yanında İctimai Şuranın sədri, iqtisadçı, professor Elşad Məmmədov deyib ki, bununla bağlı Prezident İlham Əliyev ölkəmizin maraqlarına uyğun qərarlar qəbul edəcək:

“Atılan addımlar isə təhlükəsizliyimiz, milli maraqların qorunması çərçivəsində olacaq. Sadalanan amillər imkan verərsə, qatarın işə düşməsi prosesi reallaşacaq”.

elsad

 Elşad Məmmədov

İqtisadçı bildirib ki, Bakı-Tbilisi-Bakı qatarı fəaliyyətini bərpa edərsə, işgüzar fəallıq, sosial, humanitar mübadilə də inkişaf edəcək:

“Bunun iqtisadiyyata da müsbət təsirləri mümkündür. Gürcüstanla davamlı, qarşılıqlı hörmətə, konstruktiv münasibətlərə əsaslanan, o cümlədən ticari, iqtisadi, sosial, humanitar əlaqələrimiz var. Qatarın işə düşməsi bu prosesin daha da inkişaf etdirilməsinə kömək edə bilər”.