Azad Suriya Ordusunun generalı Ziyad Hacı Ubeyd PKK/YPG terror təşkilatının böhran içində olduğunu açıqlayıb. General 25 min suriyalı əsgərin işğal altında olan ərazilərin sərhəd məntəqələrində yerləşdirildiyini bildirib. 

Hacı Ubeydin sözlərinə görə, son 20 gün ərzidə 7-8 min terrorçu qaçıb. O, Təkcə Rakkada PKK sıralarından qaçan 75 ərəb əsilli terrorçunun dağ bölüyü tərəfindən məhv edildiyini deyib. Bununla yanaşı Türkiyə rəsmiləri də Suriya ərazisində terrorçulara ciddi zərbələr endirildiyini açıqlayıblar.

Azad Suriya Ordusunun yeni hədəfi haradır? Ölkədə kürdlərin məskunlaşdığı bölgədə əməliyyatlar başlaya bilərmi?

Kainat.tv bildirir ki, Globalinfo.az-a danışan siyasi şərhçi Kənan Novruzov deyib ki, Suriyada Bəşər Əsəd rejiminin devrilməsi Türkiyənin terrorçulara qarşı mübarizəsində yeni mərhələyə gətirib çıxardı:

“Dəməşqdə hakimiyyət dəyişikliyi Türkiyənin terrorla mübarizəsinə və öz təhlükəsizliyini təmin etməsinə kömək edəcək. Azad Suriya Ordusu da bu məsələdə rəsmi Ankaranın maraqlarına xidmət edə bilər.

Türkiyə Milli Kəşfiyyat Xidmətinin  rəisi İbrahim Kalın bu yaxınlarda Suriyaya getdi. Xarici işlər naziri Hakan Fidanın da Dəməşqdə səfərə gözlənilir. Bu kimi təmasların əsas məqsədi Suriyadakı yeni hakimiyyətlə birlikdə terrora qarşı mübarizəni gücləndirməkdir. Əgər danışıqlar uğurlu olsa, Türkiyə də öz növbəsində yeni hakimiyyətin möhkəmlənməsinə dəstək göstərəcək”.