Rusiya Hökuməti Dövlət Dumasına ölkədəki çoxtərəfli nüvə ekoloji proqramına dair çərçivə sazişinin ləğv edilməsi barədə qanun layihəsi təqdim edib.

Kainat.tv Musavat.com-a istinadən xəbər verir ki, bu barədə Rusiya parlamentinin aşağı palatasının rəsmi saytında məlumat verilib.

Qanun layihəsinə baxılarkən, Rusiya xarici işlər nazirinin müavini Sergey Ryabkov rəsmi nümayəndə qismində təyin edilib.

Qeyd edilib ki, bu proqramın dayandırılması nəticəsində Rusiya, sazişlə bağlı bütün hüquqi öhdəliklərdən azad olunacaq.

Saziş 2003-cü ilin mayında Stokholmda imzalanıb. Müqavilənin tərəfləri arasında Belçika, Danimarka, Finlandiya, Fransa, Almaniya, Niderland, Norveç, Rusiya, İsveç, Böyük Britaniya, ABŞ, Avropa İttifaqı, Avropa Yenidənqurma və İnkişaf Bankı və Euratom yer alır.

Daha əvvəl, Federasiya Şurasının sədri Valentina Matvienko senatorlara beynəlxalq müqavilələri nəzərdən keçirməyi və köhnəlmiş və Rusiya üçün artıq sərfəli olmayan müqavilələri müəyyən etməyi tapşırmışdı.

Sazişin şərtləri çərçivəsində, Rusiya ilk növbədə ölkənin Şimal-Qərb regionunda nüvə sualtı qayıqlarının sökülməsi üçün istifadə olunan maliyyə və texnoloji avadanlıq almalı idi.