Tədbirdə iştirak etmək üçün 196 ölkədən 72 min iştirakçı qeydiyyatdan keçib. Dünyanın dörd bir yanından gələn dövlət və hökumət başçıları - Britaniya, İtaliya, İspaniya, Danimarka, Belçika, Finlandiya, Polşa, Yunanıstan, Çexiya, Xorvatiya, Serbiya, Afrika və Cənubi Amerika, kiçik ada dövlətlərinin və digər ölkələrin liderləri, eləcə də Avropa İttifaqı Şurası kimi təşkilatların rəhbərləri tədbirdə çıxış edib və müxtəlif görüşlərdə iştirak ediblər. Tədbirin miqyası onun nə qədər əhəmiyyətli olmasından xəbər verir.
Qısa zaman kəsiyində Azərbaycan tədbirdə çox yüksək səviyyədə hazırlaşıb və xarici ölkələrin liderləri də tədbirin çox yaxşı təşkil edildiyini bildiriblər.
Kainat.tv xəbər verir ki, tədbirin siyasi əhəmiyyətini Modern.az-a şərh edən sabiq xarici işlər naziri Tofiq Zülfüqarov bildirib ki, COP29 dünyada gedən çox böyük prosesdir.
"Bəzi insanlar bunun yalnız iqlimlə bağlı olduğunu düşünürlər. Lakin bunun müxtəlif ölkələrin iqtisadiyyatına təsiri çox böyükdür. Bir çox ölkələrdə hansısa malın satışı vaxtında orada istehsal zamanı karbon qazının ətraf mühiti nə qədər çirkləndirdiyi göstərilir. Gələcəkdə buna görə hansısa vergi və cərimələr nəzərdə tutulacaq. Çox hallarda istehlak fərqi var. Bəzi ölkələrdə çox mal istehlakı olub. Kasıb Afrika ölkələrində istehlak aşağıdır. Karbon çirklənməsində payı çox olan ölkələri ümumi fonda pul köçürməyə məcbur edəcəklər. Artıq dünyada ətraf mühiti ən çox çirkləndirən ölkələrin Çin, ABŞ və Hindistan kimi ölkələr olduğu bilinir. Tədbirə qatılmayan ölkələr bilirlər ki, burada iştirak etsələr, onlara iradlar tutulacaq. Formalaşmış fondun üçdə bir hissəsini ABŞ verməlidir. Ən çox karbon emissiyasının artmasına yol verən 5-6 ölkə var. Hazırki durumun səbəbkarı 60-70 faiz onlardır. 1 trilyona yaxın fond yığılmalıdır. Artıq 100 milyardın yığılması bu il üçün nəzərdə tutulur. Amma gələn il üçün müxtəlif təkliflər var. Təsəvvür edin, 100 milyard pul yığılmalıdır. Həmin ölkələrdən bu pulları tələb edib yığmaq, təbii ki, asan deyil".
Sabiq nazir vurğulayıb ki, bəzi ölkələr iqlim dəyişmələri ilə mübarizəyə daha çox pul xərcləməmək üçün Bakıdakı tədbirə qatılmayıblar:
"Digər yandan belə mövqe də vardı ki, qaz, karbon və neft istehsal edənlərə qarşı xüsusi vergi tətbiq edilsin. Bu böyük maraqlara ziyan gətirən mövqe idi. Olduqca mürəkkəb məsələdir. Çox yaxşı haldır ki, biz bu mürəkkəb proseslərə ev sahibliyi edir, gedən danışıqlarda öz mövqe və maraqlarımızı müdafiə edirik".
