Cavid Qurbanova etiraz edib müxalifətə keçdilər

Cavid Qurbanova etiraz edib müxalifətə keçdilər

Keçmiş daxili işlər naziri İsgəndər Həmidovun səhhətində problem yaransa da, liderlik etdiyi Azərbaycan Xalq Hərəkatına (AXH) qoşulan vətəndaşların sayı artmaqdadır.

Hurriyyet.org-a məlumat verən mənbə deyir ki, AXH-yə müraciət edənlər arasında xüsusən də Kəlbəcər sakinləri daha çox müşahidə olunur. Məlumata əsasən, təkcə ötən həftə ərzində onlarla kəlbəcərli AXH-yə müraciət edərək, Hərəkatın fəaliyyətində aktiv iştirak etmək istədiklərini bildiriblər.
Mənbə deyir ki, bu insanların bir çoxu Azərbaycan Xalq Hərəkatının perspektivinə inandıqları üçün bu təşkilata qoşulmağa üstünlük versələr də, onlar arasında Kəlbəcərin “ağsaqqalı” hesab olunan, rayonun deputatı, “Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanovdan narazı vətəndaşlar da var.
Həmin şəxslər iddia edirlər ki, C.Qurbanov Kəlbəcərin deputatı olaraq son vaxtlar sakinlərin problemləri ilə ümumiyyətlə maraqlanmır, ancaq qohum-əqrəbasını vəzifələrə yerləşdirməklə məşğuldur, hətta hansısa məsələ ilə bağlı onun qəbuluna düşmək belə, artıq mümkün deyil.
Məlumata əsasən, kəlbəcərlilər də Cavir Qurbanovun bu cür fəaliyyətsizliyinə, deputat olduğunu unudaraq son vaxtlar əksər məmurlar kimi əhali ilə arasına məsafə qoyduğuna görə, kütləvi şəkildə AXH-yə qoşulmağa qərar veriblər.
Xatırladaq ki, Kəlbəcərin əhalisi 71.100 min nəfərdir. 1 avqust 2013-cü il tarixə olan məlumata əsasən, Bakı şəhərində 8,9 min nəfər, Gəncə şəhərində 22,5 min nəfər, Mingəçevir şəhərində 3,4 min nəfər, Abşeron rayonunda 2,7 min nəfər, Bərdə rayonunda 6,5 min nəfər, Tərtər rayonunda 4,1 min nəfər, Goranboy rayonunda 7,8 min nəfər, Göygöl rayonunda 5,6 min nəfər, Şəmkir rayonunda 1,3 min nəfər, Daşkəsən rayonunda 14 min nəfər, Samux rayonunda 1,4 min nəfər, Yevlax rayonunda 4,0 min nəfər, Oğuz rayonunda 1,1 min nəfər və respublikanın digər 31 şəhər və rayonlarında 8.1 min nəfər müvəqqəti məskunlaşmışdır.

Kainat.tv